2008年全年事工計劃日，我的宣言 《圍城13日》是一套極之精彩的戰爭片
講述19世紀初，德州居民因為被墨西哥統治一段好長的時間，佢地好想獨立，
所以就死守阿拉莫城，以示獨立的堅決，
但墨西哥派左成萬的正規軍，將佢地重重圍困。
面對這場強弱懸殊的戰爭，頑強的民兵係開頭，重創了墨西哥軍隊，
但堅守左13天後，因為彈盡援絕，全部戰死沙場。
最後，知名的休士頓將軍率領一批義勇軍趕來救援，
徹底擊敗墨西哥軍隊，德州因此也正式脫離墨西哥正式獨立。
講真，就係因為死守阿拉莫果班人的精神，震憾左成個德州同墨西哥，
以致佢地好快宣報獨立
係死守１３日的過程裡面，好多人都覺得，冇可能會打贏，
百零人點樣抵抗，成千上萬大軍，你估戰狼三百呀！即使戰狠三百都冇得打
佢地的感受，就好似昔日以色列人，派了探子進入迦南地時，
覺得果度D人個個係阿力舒華辛力加，冇可能打贏佢地，
百幾人，點同成萬人打，就係咁，好多人想放棄，想投降，想做逃兵，
因為個個打扙打到殘晒，援兵又未到，為左死守呢個城，個個冇覺好瞓，最慘就係敵方的將軍，成日威迫利誘，不斷咁慫恿佢地投降，得到的條件就係唔使死，亦唔會追究，50年不變, 馬照跑，舞照跳，好多人都想放棄， 呢個時候，佢地的將軍覺得好唔妥，如果個個都縮沙，真係未打先輸，
終於，係佢地即將耗盡，即將縮沙的時候，出黎講左以下一番氣概萬千，
感人肺腑，激勵人心的說話；我地一齊聽吓，深信對我地一班委身教會的事奉者，有好大的啟迪（請參該片disc2 13:55-16:45）
嘩，好勁的宣言：令到呢班人個個甘願死守呢個阿拉莫城，雖然最後結果，就係呢班奮勇作戰的人，全部死晒，但卻為德洲帶來新的希望，新的自由，冇幾耐，德州宣佈獨立，所以，佢地的死，係有價值的！ 今日我地事奉有價值嗎？今日我地會死守協和堂嗎？
德洲俾佢地有第二次機會，協和堂俾左我地幾多次機會？佢地個個唔係單單為發財，而是想重新做人，想搵番做人的尊嚴，搵番國家的尊嚴
做一個更好的人，德洲的精神是甚麼？佢將會變成乜野的地方？ 就係我地剛才討論的最後一條題目: 有甚麼值得你地甘心樂意去戰鬥，即使付上時間，甚至付上生命，都在乎不辭，呢個就是德洲精神 今日協和堂的精神又係乜呢？協和堂又會變成乜野的地方？ 「有甚麼值得我地甘心樂意去事奉，不論付上多少時間，甚至付上生命都願意，呢個這就是協和堂的精神！」 弟兄姊妹，我知道，今日我地返協和堂唔係為左求財，因為我地冇乜財俾大家求，我地返教會，係為左尋求上帝，接近上帝，希望係神度，搵番基督徒的尊嚴，以致我地有能力繼續上路！ 但好多時，撒旦就好似墨西哥將軍咁，不斷出招，威迫利誘，叫我地棄城而逃，
佢不斷咁分化我們，叫我地不再事奉，即使事奉，都可以求求奇奇，
可有可無的心態去事奉，
撒旦叫我地淡出，叫我地放棄，叫我地唔好再忍落去，唔好再撐落去，
叫我地唔好再堅持，呢D負面文化成日困擾我地，令到我地不攻而破！ 德州將軍果三分鐘演講，提到「唔再打扙，離開戰場，似乎係一個好的選擇，
就好似我地一樣，唔再事奉或者減少事奉，甚至抽離一陣間，似乎是最好的選擇，
總好過係戰場，係協和堂坐以待斃，又冇支援，又孤單作戰，功力又唔夠；
你越事奉，阻力同困難越黎越大，撒旦的攻擊更加會排山倒海咁湧埋黎，
所以唔do，離開戰場，似乎係最好的選擇， 但我同果位將軍相信，如果我地選擇繼續留守係戰場，留守係協和堂，
即使面對撒旦綿綿不絕的炮火攻擊：攻擊我地家人，攻擊我地生活，
我深信各位組長，各位導師，各位家長，各位同工，只要我地靠著上帝，大家都係一夫當關，萬夫莫敵，千奇唔好睇少自己，你得既！千奇唔好放棄 我地唔單止向慈黃區向協和書院，向我地家人朋友同學同事，
展示我地對福音的熱誠有幾大，
對靈魂的重視有幾深，一個都唔能夠少，
甚至對上帝的愛，對佢的信心有幾咁實在，
我地仲要挫敗撒旦的軍隊，我地仲要抗衡所有負面的文化 邊個打算離開協和堂，或者唔想再事奉的，我kingo唔會攔阻你地，
就好似《圍城１３日》的人一樣，你地向敵人，向撒旦舉起投降的白旗，
你地幾時走都得，因為呢個係上帝俾你地的自由同埋權利，
但如果你地決定繼續留低，同我kingo並肩作戰，保衛協和堂，
就讓我地一齊同心重創敵人！齊心擊退撒旦！
唔好再有埋怨，唔好再有批評，唔好再有指控，唔好再縮沙，唔好再消極，唔好再放棄，唔好再灰心，要好好順服上帝的帶領，
好好憑著上帝俾我地的智慧，同心一齊彼此建立，
建立一個上帝喜悅的教會，讓協和堂早日成為慈黃區的一盞明燈！ 事奉係辛苦的，你問D父母，揍仔點會唔辛苦，但我相信 只要你肯作戰，上帝一定保守，佢一定派支援隊比我地，即或不然，即使我地戰死沙場，只要我地今日的事奉，能成為別人的祝福，能夠使上帝得著榮耀，
我地亦在所不辭，呢個就係協和堂的精神！
不為甚麼，單單為我地的罪釘死係十架上的耶穌基督，就係咁簡單，我地要高舉耶穌，要耶穌係我地身上得著榮耀！
弟兄姊妹，我信上帝的計劃，我信上帝的安排，我更信上帝的保守同帶領！ 願上帝祝福我地！
| 